Akhlaaq-Tasawwuf

Vise akhirat

Ene flèche li capave la chasse ene cerf couma li capave touye ene khinzeer (porc). Tout dimoune conné différence ki ena entre les deux. Coumsa même ça la langue ki trouve entre ça deux la mâchoire-là capave faire ou rente dans jannat ou bien li capave jette ou dans l’enfer. Ça depanne couma nou servi li. Similairement chaque tasbeeh ki nou faire, li représente ene zarbre dans jannat. Ça donne nou ene l’idée ki quantité zarbre dans jannat nou pe perdi derrière banne pratiques et activités futile et inutile.

Faveur lors banne ki ena taqwa

Taqwa veut dire l’obéissance à Allah Ta’ala. Nou obéir Allah Ta’ala par exécute tous banne commandements et par abstenir de tous ceki li fine interdit. Fodé ena les deux aspects pou nou capave dire ki nou pé obéir Allah Ta’ala. Par pratique banne ibaadat saisonniere couma faire namaz à l’occasion de Shabe Baraat, jour Jum’ah ou bien le 10eme jour de Mouharram nou pas prouve nou l’obéissance à Allah Ta’ala. Ça banne ibaadat ki nou faire à ça banne l’occasion-là en forme zikrullah, namaz, tilawatul Qur’aan et roza etc.

Etre positif

Li pas ene déshonneur si kikene dire ou ki ou dans l’erreur. Ene médecin li pas faire kikene ditort si li dire li ki li ena cancer. Parceki li pas mette cancer avec li. Necque li montré li ça maladie ki ena dans li. En réalité li pé ranne li service. Coumsa même pé attire ou l’attention vers manquement ki ou ena dans ou. Si ou pé alle préside ene cérémonie et ene kikene dire ou ki ou fine taille ene seul coté moustache, alors eski ou bizin en colère ou bien ou bizin remercié li ?

Le remede

Ene problème li dimane être remédié. Mais d’abord bizin conne le problème et ensuite le remède. Et ça aussi li important ki ena la possibilité pou dispose le remède à ça problème-là dans l’état et dans l’endroit cote li été. Ena des fois ou capave ena tous les moyens mais ena banne obstacles ki empêche ou servi banne moyens ki dans ou disposition. Similairement ene personne avec ene statu de chef d’état aussi capave ena ene désir ardent pou aide ou mais li aussi li capave ena banne contraintes.

Premier mi-temps/2eme mi-temps

Dounia li couma dire premier mi-temps et aakhirat c’est deuxième mi-temps. Ene ki gagné dans premier mi-temps, li pas nécessaire ki li pou pareil dans deuxième mi-temps aussi. Combien ena ki zotte situation paraite favorable dans commencement mais dans la fin li détérioré pou termine avec ene grand l’échec. So le contraire aussi li bien vrai. C'est-à-dire ena ki so situation bien pas bon dans commencement mais li faire miracle dans la fin avec ene victoire fracassante.

Ene faille mentalité

Allah Ta’ala pas content quand kikene faire kikene ditort. Pas gagne droit faire personne ditort. Ene zanimo aussi li mérite ene bon traitement. Sinon ena ene compte à rendé cote Allah Ta’ala. Ene madame ti martyrise ene chatte par attache li sans donne li mangé boire ziska ki chatte-là fine mort. Nabi ‎(Sallallaahou A'laihi Wasallam)‎ fine trouve ça madame-là pé gagne punition dans jahannam. Si dans faire ditort ene zanimo ena ene conséquence grave, alors ki quantité grave li pou été si faire ene insaan ditort.

Zeffort dans vide

Zeffort li dimane l'énergie physique, l'énergie mental et le temps pou réalisé. Couma nou l'existence li limité, nou l'énergie aussi dans tout so forme li limité. Dans tigite le temps nu capave gagne boucou par canalise nou zeffort efficacement. Et dans boucou le temps nou capave gagne bien tigite ou pas gagne narien ditou avec banne conséquence grave quand nou zeffort li mal orienté.

Syndicate content